Бардык адам баласы мусулман болуп төрөлөбү?

Бисмиллахир Рохмаанир Рохиим

الجواب حامدا ومصليا

Ооба, адам баласы төрөлгөндө Ислам дининин (б.а. хак туура жолду) кабыл кылганга даяр болуп төрөлөт. Ал эми ата энеси башка жолдо болсо, аны туура жолдон адаштырып коёт. Бул боюнча сахих хадис китептерде риваяттар келтирилген. «Сахих Бухари» китебинде төмөнкү риваят бар: Азирети Абу Хурайра (розияллоху анху) айтат: «Пайгамбарыбыз (соллаллоху алейхи ва саллам): «Бардык төрөлгөн наристелер фитратта (туура жолду кабыл кылууга даяр болуп) төрөлөт. Кийин ата-энеси аны же жөөт (яхудий) кылып, же крестиан (насроний), же отпарас (мажусий) кылып (тарбиялап) коет. Мунун мисалы үй жаныбарлары сыяктуу. Жаныбар туулганда анын (кулак ж.б) мүчөлөрү кесилип туулганын көргөнсүңбү?» –  деп айткан». (Сахих Бухари 1385-хадис)

Демек, жаныбар туулганда мүчөлөрү кесилбестен эле туулат. Аны кийин жаныбардын ээси кесип коет. Дал ошол сымал эле адам баласы төрөлгөндө Ислам дининде болуп төрөлөт. Аны кийин ата-энеси бөлөк динге тарбиялап коет.

Аллах Таала бардыгыбызды мусулман болуп төрөлүп, мусулман абалда жаныбызды алган болсун! Аамиин...

عن أبى هريرة رضى الله عنه قال قال النبي صلى الله عليه و سلم: "كل مولود يولد على الفطرة فأبواه يهودانه أو ينصرانه أو يمجسانه كمثل البهيمة هل ترى فيها جدعاء؟". (البخارى رقم ١٣٨٥)

و الله أعلم بالصواب و بالله التوفيق